९ असोज, पोखरा । अखिल (क्रान्तिकारी)का अध्यक्ष रञ्जित तामाङले विद्यार्थीहरु एमालेलाई धुलो चटाउने दिन कुरेर बसेको बताएका छन् ।

बिहीबार कास्कीको लामाचौरमा आयोजित अखिल (क्रान्तिकारी) गण्डकी प्रदेशको सम्मेलनलाई सम्बोधन गर्दै तामाङले आउँदो स्ववियू निर्वाचनले एमाले भातृ संगठन अनेरास्ववियुको औपचारिक विदाई गर्ने जिकीर गरे ।

केपी ओलीको पटक–पटकको प्रतिगमनकारी कदमलाई साथ दिएर एमाले निकट अनेरास्ववियुले विद्यार्थी आन्दोलनमाथि कालो पोतेको आरोप लगाउँदै तामाङले भने, ‘मुलुकभरका शैक्षिक संस्थाहरुमा विद्यार्थीहरु हिसाब गरेर बसिराखेका छन् । आउँदो स्ववियू निर्वाचनमा प्रतिगमनको मतियार बनेको अनेरास्ववियुका निम्ति अन्तिम निर्वाचन हुनेछ ।’

आउँदो निर्वाचनमा गाउँ–गाउँका जनता एमालेलाई धुलो चटाउने दिन कुरेजस्तै लाखौं विद्यार्थीहरु अनेरास्ववियुको विदाईको निम्ति स्ववियू चुनावको मिति कुरेर बसेको उनले बताए ।

कार्यक्रमलाई अखिल (क्रान्तिकारी)का उपाध्यक्ष विजय गौतम, उपमहासचिव जीपी मैनाली, केन्द्रीय सचिव प्रविना अधिकारी लगायतले पनि सम्बोधन गरेका थिए ।
अनलाइन खबर बाट।