काठमाडौं– जिल्ला समन्वय समिति मकवानपुरको प्रमुखमा गठबन्धनका उम्मेदवार ललित घलान निर्वाचित भएका छन् । जिल्ला समन्वय समिति मकवानपुरको बिहीबार सम्पन्न निर्वाचनमा उनले १७ मत प्राप्त गर्दै निर्वाचित भएका हुन् । उनी नेकपा माओवादी केन्द्रबाट उम्मेदवार बनेका थिए ।
उनले नेकपा एमालेका उम्मेदवार बनेका बुद्धिराम डिम्डुङलाई पराजित गरेका हुन् । उनले ३ मत मात्र प्राप्त गरे । उपप्रमुखमा नेपाली काँग्रेसका सानुकाजी लुइँटेल निर्विरोध निर्वाचित भइसकेका छन् ।

जिससको सदस्यतर्फ गठबन्धनका उम्मेदवारहरू निर्वाचित भएका छन् । महिला सदस्यमा तारा ढुङ्गाना, विष्णुमाया थपलिया र सुमित्रा थिङले १७ मत प्राप्त गर्दै निर्वाचित भएका छन् । उनीहरु नेपाली काँग्रेसबाट उम्मेदवार बनेका थिए ।

जिसस मकवानपुरको महिला तर्फको सदस्य पदमा एमालेबाट उम्मेदवार बनेका बिनाकुमारी थिङ लामाले ३ मत प्राप्त गरेकी छिन् । त्यस्तै खुल्ला सदस्य तर्फमा खड्गबहादुर पुलामी, सुवर्ण गोपाली र वीरेन्द्रकुमार लामा निर्वाचित भएका छन् । पुलामी र गोपालीले १७ मत प्राप्त गरेका छन् । उनीहरु माओवादी केन्द्रबाट उम्मेदवार बनेका थिए ।
नेकपा एकीकृत समाजवादीबाट उम्मेदवार बनेका लामाले १६ मत प्राप्त गरेका थिए । एमालेका उम्मेदवार तोयानाथ तिमल्सिनाले ३ मत प्राप्त गरेका छन् ।