मोरङ, केराबारी गाउँपालिका वडा नम्बर- ९ बेलचौरी र देबिझोडालाई जोड्ने लोहोन्द्रा खोलामा झोलुङ्गे पुल निर्माणको आज सिलान्यास सम्पन्न भएको छ। पुल निर्माण सुरु भएपछि स्थानीयवासी उत्साहित बनेका छन्।

सिलान्यास कार्यक्रमका प्रमुख अतिथि मोरङ क्षेत्र नम्बर–१ का पूर्व प्रतिनिधि सभा सदस्य डिकबहादुर लिम्बू रहेका थिए । उनले उत्तरी मोरङको विकासका लागि आफू निरन्तर पहल गरिरहेको बताउँदै बदलिँदो राजनीतिक परिस्थितिले निर्माण क्षेत्र प्रभावित हुँदै आएको उल्लेख गरे। सरकार परिवर्तनसँगै सानातिना शीर्षकका बजेट रोकिँदा जनताका माग अनुसार पूर्वाधार विकासका काम अघि बढाउन कठिनाइ भएको मन्तव्यका क्रममा बताए।

कार्यक्रमका विशेष अतिथि वडाध्यक्ष गोपाल याख्खा रहेका थिए। स्वर्णिम पिङला जेभी, काठमाडौंले रु. ३ करोड ३ लाख ९७ हजार लागतमा पुल निर्माणको ठेक्का पाएको छ। पुल आगामी आर्थिक वर्ष २०८४ को साउन २९ गते सम्म निर्माण सम्पन्न गर्नेगरि सम्झौता भएको छ ।

वडाध्यक्ष याख्खाले बर्खायाममा स्थानीयहरूलाई लोहोन्द्रा खोलापार गर्दा निकै सास्ती हुने गरेको बताउँदै पुलका लागि बजेट सुनिश्चित गर्न धेरै मेहनत गर्नुपरेको स्मरण गरेका थिए । उनका अनुसार पुल निर्माण सम्पन्न भएपछि बेलचौरी र देबिझोडाका बासिन्दा तथा विद्यार्थीहरूले सुरक्षित र सहज ढङ्गले आवत–जावत गर्न सक्नेछन्।

स्थानीयको दीर्घकालिन अपेक्षा रहेको यो झोलुङ्गे पुल निर्माणसँगै केराबारी–९ मा आवागमन र आर्थिक गतिविधि सहज हुने जनाइएको छ। भने कार्यक्रमका अन्त्यमा पुल निर्माणका लागि बजेट सुनिश्चित गर्न महत्त्वपूर्ण भुमिका निर्बाह गरेको भन्दै केराबारी -९ नम्बर वडाले कार्यक्रमका प्रमुख अथिती लिम्बुलाई कदरपत्रले सम्मान समेत गरेको छ।