लेटाङ, मंगसीर–८। लेटाङ–४ स्थित संसेवन बचत तथा ऋण सहकारी संस्था लिमिटेडले आफ्नो २०औँ स्थापना दिवस विभिन्न औपचारिक कार्यक्रमसहित सम्पन्न गरेको छ। कार्यक्रमको अध्यक्षता संस्थाका अध्यक्ष सौराज राईले गरेका थिए। भने स्थापना दिवसको उद्घाटन कार्यक्रमका प्रमुख अथिती संस्थापक अध्यक्ष दहशेर राईले दिप प्रज्वलन गर्दै केक काटेर गरेका थिए। स्वागत मन्तव्य उपाध्यक्ष ढकमसरी राईले प्रस्तुत गरेकी थिइन्।

कार्यक्रमका क्रममा संस्थाको लोगो अंकित केक काटी उपस्थित शेयर सदस्य, कर्मचारी तथा अतिथिहरूबीच खुशीयाली साटासाट गरिएको थियो। सो अवसरमा पूर्वअध्यक्ष दिलाराम राईले संस्थाको प्रारम्भिक संघर्ष, स्थापना पृष्ठभूमि र हालसम्मको गतिविधिबारे प्रकाश पाउदै सहकारीको भूमिकालाई महत्वपूर्ण रूपमा व्याख्या गरेका थिए।

प्रमुख अतिथि दहशेर राईले “किन संसेवन बचत?” भन्ने विषयमा स्पष्ट धारणा राख्दै संस्थाको पारदर्शिता, भौतिक सम्पत्तिको सुरक्षा तथा स्थानीय नेतृत्वको विश्वसनीयता नै संस्थाको मुख्य बल रहेको उल्लेख गरे। “सञ्चालक समिति यही समुदायका सदस्य हुन्।

संस्थाको सम्पत्ति सुरक्षित छ, सदस्यहरूले ढुक्क भएर लगानी गर्न सक्छन्,” उनले भने। साथै, सहकारीले बजारभन्दा न्यून ब्याजदरमा जनमुखी सेवा प्रदान गर्दै आएको दाबी गरे।कार्यक्रममा सल्लाहकार मित्रप्रसाद बिमलिलगायत वक्ताहरूले सहकारी क्षेत्रको सुदृढिकरण तथा समुदायमा यसको भूमिकाबारे सुझाब सहितको मन्तव्य राखेका थिए।

स्थापना दिवसको अवसरमा संस्थाले विभिन्न क्षेत्रका व्यक्तिहरूलाई सम्मान गरेको छ ।

एकल महिला, जेष्ठ नागरिक, एसईईमा उत्कृष्ट अंक प्राप्त गर्ने विद्यार्थीहरू—तपन आचार्य र सेसेहाङ लिम्बू—लाई नगद तथा कदरपत्र प्रदान गरेर सम्मान गरेको हो। साथै विपन्न वर्गका विद्यार्थीहरूलाई ब्याग तथा नगद सहयोगसमेत गरिएको छ । त्यस्तै, उत्कृष्ट बचतकर्ता, उत्कृष्ट ऋणी तथा बाल बचतकर्तालाई पनि सम्मान गरिएको संस्थाले जनाएको छ। कार्यक्रमलाई समापन गर्दै संस्थाका अध्यक्ष सौराज राईले आगामी दिनमा सेवा तथा कार्यक्रमलाई अझ प्रभावकारी र समुदायमुखी बनाउँदै लैजाने प्रतिबद्धता व्यक्त गरेका छन्।